決戰薯片之巔（下）
上集：https://bit.ly/331xDYF
阿哥爽快承認：「你嗰隻健康薯片，我搵人拎出嚟畀我食過，味道好差。」
「我都知唔完美，但至少健康方面改進咗好多，口味方面我會慢慢改善架。」我強調。
阿哥好激動：「呢種垃圾推出市場，顧客只會話佢難食，我絕對唔容許『難食』呢兩個字放喺我哋嘅品牌上！」
「我哋都分咗家啦，點解你仲要搞我？」我嘆氣。
阿哥冷笑一聲，遞咗一塊薯片畀我。
我一啖咬落去，又香又咸嘅味道瞬間充斥我嘅口腔，俘虜我每一個味蕾。
我呆咗：「你……呢個就係『好味薯片』？」
「係啊，一啲都唔健康。如果你食一包以前嘅薯片，就會爆瘡，咁呢種薯片，你食三塊就會爆瘡。」阿哥答。
我強調：「咁都唔係辦法，冇乜人肯為咗食薯片，搞到自己又肥又爆瘡架嘛，健康真係好重要。」
阿哥解釋：「冇錯，因為呢種薯片仲未夠好食，未足以令人拋低所有顧慮。所以我冇將佢推出市場，我一定會研發出更好食嘅薯片。」
我忍唔住問：「你咪努力囉，咁同你搞我有咩關係？」
「只有呢種心態，先可以喺薯片戰場上，一決雌雄。」
阿哥眼神堅定：「你係我唯一嘅對手，我絕對唔容許你得過且過，隨便整隻薯片就推出市場。」
阿哥堅定嘅眼神，激起我心頭嗰團火。
我咬牙切齒咁講：「我，一定會研發出最健康，而又好食嘅薯片！」
自此之後，我更加全心全意地投入研發工作。
皇天不負有心人，我終於研發到一種對身體無害嘅薯片，幾乎好似生果咁健康。
口味方面，同以前嘅薯片一模一樣。
我拎住一袋健康薯片，想將呢個好消息話畀阿哥聽。
路上，我喺度諗，阿哥會有咩反應呢？佢會垂頭喪氣咁認輸，定唔服氣，認為我嘅薯片唔夠好食？
點知，我去到阿哥間公司，佢嘅實驗室已被查封，個個員工都惶惶不可終日。
原來，阿哥研發薯片時，佢發現食物嘅味道再好，帶來嘅快感都係有限嘅。
佢瘋狂地渴望，佢嘅薯片可以為大腦帶來更大嘅刺激，可以令人輾轉反側，不顧一切都要食。
於是，阿哥開始嘗試喺薯片中加入毒品，取得咗一啲成果，佢就想買更多毒品嚟做實驗，結果就被拘捕，實驗室都被查封。
我去探監，阿哥好灰：「就算我真係整到毒品薯片，令顧客上癮嘅都係毒品，而唔係好味嘅薯片。唉，我之前真係走火入魔。」
我安慰阿哥，再話埋畀佢知，我已經研發好健康薯片。
「你贏咗，薯片帝國嘅未來就靠你啦。」阿哥雙眼終於有番啲神采：「如果健康薯片真係有你講咁好，一定會大受歡迎。」
我都係咁諗，喺阿哥嘅同意下，我整合番阿哥同我嘅公司，合二為一，全力生產健康薯片。
我以為，我一定會成功，甚至係已經成功咗。
點知健康薯片面世後，銷量唔高，應該話，所有嘅薯片銷量都大跌。
因為有一間IT公司，厚積薄發，推出咗一個完善嘅全息網遊。
只要戴上頭盔，思想就可以進入遊戲，而遊戲嘅內容包羅萬有，除咗傳統打怪升級，仲可以享受現實有嘅嘢，睇戲、同朋友聚會、品嚐美食……
喺遊戲中娛樂，成本低廉，效果又真實，一時間，大部份人嘅娛樂都轉晒落遊戲度。
雖然喺遊戲裡食嘢唔可以飽肚，但可以想像，大家食零食嘅時間，都會轉晒落遊戲度。
零食界大受打擊，我嘅健康薯片亦無法引起任何關注。
畢竟，喺遊戲裡食薯片，絕對唔會肥，亦唔會熱氣，味道都唔比現實中嘅薯片差。
健康薯片一敗塗地，薯片帝國都面臨倒閉，唉。
我同阿哥都以為，我哋只要將薯片造得更好，更健康或者更好味，就會有更多人買。
我哋將對方視為對手，一心想造出比對方更好嘅薯片。
但原來，唔係品質更好就會贏，打敗薯片嘅，都唔一定係薯片，可以係IT，可以係世界嘅轉變。
呢個世界好大，條條大路通羅馬，但「條條大路」之間其實係互通嘅，亦會互相影響。
一心向羅馬進發嘅同時，都要留意吓，其他大路發生緊咩事。
－完－
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #決戰薯片之巔
Search